Ervin Skela, në garën për golin e muajit

Rrjeta e realizuar nga Ervin Skela në ndeshjen e Kupës kundër Bajer Leverkusen është nominuar mes kandidateve për çmimin “Goli i Muajit” në Gjermani.

Goditja e lirë, e ekzekutuar mjeshtërisht nga mesfushori kuqezi, nuk i shërbeu Kotbus, që u eliminua pas humbjes 3-1. Megjithatë, ajo nuk mahniti vetëm Rudi Fëler (drejtorin teknik të Leverkusenit), por edhe të gjithë tifozët. Anketa realizohet nga televizioni ARD, në emisionin “Sport Show” (“Sportschau”), e cila është kthyer në traditë që prej vitit 1971.

Votat e të pasionuarve të futbollit do të zgjedhin “Golin e Muajit” për periudhën janar 2009, ku përveç Skelës në garë janë edhe Renato Augusto (Leverkusen), Shvajnshtajger (Bajern Mynih), Farfan (Shalke) dhe Serxho Pinto (Hanover). Anketa mbyllet më 7 shkurt dhe goli fitues do të bëhet publik në emisionin e radhës.